CEBU, Philippines - Sa prisohan mitugpa ang usa ka polis human kini nadakpan sa iyang mga kauban nga polis sulod sa usa ka drug den atol sa drug raid operation sa kapulisan sa Dumanjug niadtong Martes sa kaadlawon diha sa Brgy.Bitoon.
Ang polis nga gidakop mao si Police Officer 1 Ronald Sacan, taga Brgy. Paculob sa maong lungsod, sakop sa alert team sa Dumanjug Police Station.
Sumala pa ni Police Offficer Romeo Legaspi Jr., sakop sa alert team sa Dumanjug Police nga nahinabi sa Banat News nabantayan nilang pirmeng mobiya sa trabaho si Sacan.
Gihulagway ni Legaspi nga ligoy sa trabaho si Sacan apan wala sila nagtuo nga tiggamitan diay kini og shabu ug sila pa sa ilang team ang makadakop kaniya.
Atol sa pagkasikop ni Sacan, on-duty kini nianang mga orasa apan nilakaw kini human mi-report.
Tumong unta sa ilang operasyon ang usa ka drug suspek nga si David Quirante Jr., 22, nga nagdumala sa usa ka drug den diha sa Brgy. Bitoon, apan wa sila magdahom nga si Sacan ilang maabtan didto nga nagsuyop og shabu.
“Wa mi kasabot sa gibati adto, mura mi og nauntol, murag nindot kaayo nga ikasuko nga mura mig naulaw, wa mi katingog, naglingolingo na lang intawon ang mga kauban namo,” matud pa ni Legaspi.
Nasikop usab sa maong operasyon sila si Ranilo Asentista, 48, Shery Dupal-ag, 26, Andrew Nemil, 28 ug ang target nilang si Quirante ug nakuha usab sa dapit ang mga pinaketeng shabu ug granada.
Ang hepe sa Dumanjug Police nga si Senior Inspector Jose Villarin miingon nga dili sila modupa sa mga badlungong polis. Matud pa niya, kaniadto pa siya nakadawat og mga impormasyong tiggamitan og drugas si Sacan maong kanunay siyang nipahimangno niini.
Sa gihimong drug test human sa pagkasikop ni Sacan nigawas nga positibo kini sa drugas.
Ang direktor sa Cebu Provincial Police Office, Sr. Supt. Noel Gillamac miingon nga angay pasakaan og kasong kriminal ug administratiba si Sacan ug ibalhin sa holding unit sa CPPO samtang magpadayon ang imbestigasyon. (Jojo C. Ugdol ug Rowena Capistrano/EIM)(BANAT NEWS)