Luna sa CPA gamiton nga MRF sa Ermita

CEBU, Philippines - Nagpatabang si Barangay Ermita Kapitan Felicisimo Rupinta ni Mayor Michael Rama ug sa konseho sa dakbayan sa Sugbo nga makagamit pa sila sa luna luyo sa Unit 3 sa Carbon Public Market.

Si Rupinta nagkanayun nga nasubo sila sa Cebu Port Authority tungod sa pagpahawa kanila sa mao’ng luna.

Ang luna gamiton sa barangay isip ila’ng Material Recovery Facility (MRF) diin i-recycle ang mga basura nga makuha aron mahimo’ng hollow blocks, unlan ug abuno sa tanum.

Dugang ni Rupinta nga niadto’ng tuig 2010 gisugdan nila og gamit ang luna sa ila’ng MRF aron maminus ang mga basura nga ilabay ngadto sa Inayawan Landfill.

Gipakuha ang MRF sa barangay tungod kay matud pa ni Rupinta gamiton na sa CPA ang luna apan human sa duha ka tuig wala pa kini magamit sa CPA.

Si Rama dili mosugot nga gamiton ang luna sa CPA tungod kay dili kini ilaha ug giklaro usab ni Rama nga dili sad kini panag-iya sa dakbayan sa Sugbo. (BANAT NEWS)