CEBU, Philippines – Gihangop sa mga residente sa tulo ka barangay nga naglangkub sa Rosario, Tupas ug Kandingan sa Aloguinsan ang pagtukod og bag-ong parokya nga nganlan og San Jose Parish.
Gipahigayun ang Santos nga Misa niadto’ng Domingo ug gisunod ang groundbreaking sa katukuran sa parokya sa barangay Rosario.
Ang misa gipangulohan ni Msgr. Vicente Rey Penagonda ug Fr. Roberto Ebisa ug nitambong si Galo Caballero, ang representante sa pamilya nga nagdonar sa yuta ingon man si Fr. Joseph Gabriente, ang kura sa mao’ng parokya ug ang katawhan gikan sa tulo ka barangay.
Matud ni Penagonda nga ang balay ampoanan nga tukuron timailhan sa pag-ila sa katawhan ngadto sa Diyos ug ang katukuran niini wala magdepende sa gidak-on sa gihatag kung dili magdepende kini sa gidak-on sa gugma.
Si Kapitan Antonio Atil sa barangay Tupas malipayon sa katukuran unya sa mao’ng simbahan tungod kay dili naman sila mogasto og daku sa pagsimba matag adlaw nga Domingo ug malaumon nga magmakugihon na ang katawhan.
Si Caballero nibutyag sa Banat News nga ang iya’ng manghud nga si Eriberto kinsa nipanaw na sa laing kalibutan ang nangandoy nga duna sila’y kaugalingon nga simbahan sa ila’ng lugar aron ang mga tawo dili na moadto sa laing lugar sa pagpanimba.
Kini ang hinungdan nga ila gidonar ang luna alang sa mao’ng plano. Sa pagkakaron, sa kapilya sa Rosario una gipahigayun ang misa. – /GMR) (BANAT NEWS)