CEBU, Philippines - Murag eksena sa pelikula ang nasaksihan sa mga tawo sa eskina sa dalan Borromeo ug Colon sa dakbayan sa Sugbo kagahapon sa buntag dihang usa ka 40 anyos nga lalaki nga naka sunglasses ang mikatkat sa billboard sa usa ka botika sa maong lugar kagahapon sa buntag.
Ang maong lalaki naila nga si Marcelino Candido, wala pa matino kun asa nagpuyo giluwas sa mga bombero ug gidala sa Vicente Sotto Memorial Medical Center for Behavioral Sciences Department.
Kung wala hayloa og pagkaon gikan sa usa ka sikat nga fastfood chain sa maong lugar dili pa unta kini mokanaog paglabay sa dul-an usa ka oras nga negosasyon sa mga sakop sa Bureau of Fire, Carbon Police Station ug sa City Disaster Risk Reduction and Management Office.
Si Chief Inspector Noel Lomente ang hepe sa Carbon Police miingon nga si Candido nakit-an ibabaw pasado alas -6 sa buntag apan wa lang kini panumbalinga sa mga tawo, apan dangtan na lang og pipila ka minutos anaa pa gihapon kini sa ibabaw ug wala manaog hinungdan nga naalarma na ang mga tawo.
Si Harold Alcontin sa CDRRMO miingon nga miabot og 45 minutos ang ilang negosasyon ayha kini nanaog dihang gipakitaan og pagkaon.
Matud pa ni Alcontin nga iyang gisuhid ang paagi ni Cebu City Vice Mayor Edgardo Labella nga mikombinsir sa usa ka tawo nga mikatkat ‘sab sa billboard niadtong nakalabay nga semana didto sa may Carreta.
Dihang nakapaduol kaniya ang mga bombero nga nagbitbit og pagkaon diha sa ibabaw nga bahin, diretso siyang gigaid ngadto sa portable stretcher ug gitunton paubos ug diretsong gisakay og ambulansya padung sa VSMMC.
Duna karoy plano ang siyudad mopanday og ordinansa nga kinahanglang ang mga estraktura sa billboards dinhi sa siyudad di masayon-sayon og saka sa mga tawo aron di na kini masubli pa. (BANAT NEWS)