CEBU, Philippines – Susihon sa Commission on Human Rights ang pagpalukdo og kahoy nga bangko sa maestro sa mga tinun-an sa Busay National High School sa lungsod sa Moalboal sulod sa 6-minutos human na-zero sa quiz sa Science class ug nagsaba-saba sa classroom.
Matud ni Atty. Arvin Odron, officer-in-charge sa CHR-7, nga ang mao’ng silot usa ka sayop ug dili makiangayon alang sa mga estudyante. Susihon sa CHR-7 ang katinuoran sa taho nga una’ng gipadangat sa sibyaanan sa dyHP ug CCTN.
Dugang ni Odron nga karon nga nasayud na sila sa report, iya’ng ipatawag ang atensiyon sa investigation section sa ahensiya aron makapahigayun og imbestigasyon.
Sigun ni Odron nga ang pagpalukdo og bangko sa mga tinun-an adunay psychological effect sa mga bata sama sa pagka-trauma diin mahadlok na sila masayop sa ila’ng buhaton.
Sutaon sa CHR-7 kung may human rights violation ba nga nahimo ang magtutudlo. – /GMR) (BANAT NEWS)