CEBU, Philippines – Gilubong na kagahapon si Baby Christine, ang anak ni Charito Topacio, nga nireklamo sa Talisay District Hospital human namatay ang iya’ng anak nga giingong biktima sa medical mishandling sa tambalanan.
Karon nga nalubong na ang bata, sabutan pa sa pamilya ang sunod nga lakang nga ila’ng buhaton.
Nanghinaut si Topacio nga ang nahitabo kaniya dili na mahitabo sa lain pa’ng ginikanan tungod kay dili lalim ang kasakit nga ilang gibati.
Sayo niini ang kadagkuan sa hospital niingon nga patay na daan ang bata sulod pa lang sa tiyan.
Apan ang mga pamahayag sa tambalanan gihulagway ni Charito nga daku’ng sayop kay matud pa niya nasayud siya lakip ang iya’ng mga kauban nga buhi ang anak.
Giangkon ni Topacio nga nahadlok siya mosulti sa tinuod nga nahitabo basin unya og unsa’y mahitabo sa iya’ng pamilya.
Apan karon nga nalubong na ang iya’ng anak, maisugon na niya nga gisaysay ang insidente.
Giingong nataranta ang nag-atiman kang Topacio ug duha ka oras ang nilabay dihang suway nga gipagawas ang bata apan wala gyud mogawas hinungdan nga nakadesisyon ang TDH nga ibalhin siya sa Vicente Sotto Memorial Medical Center. – /GMR) (BANAT NEWS)