CEBU, Philippines - Mas gamay lang ang mga insidente sa sunog nga natala sa pagtak-op sa “Fire Prevention Month” sumala pa sa buhatan sa Cebu City Fire Department.
Mikabat sa 20 ka mga sunog ang narespondehan sa kabomberohan sa bulan sa Marso 2015 mas gamay kini itandi sa 29 ka sunog sa Marso 2014.
Sa kinatibuk-an sulod sa tulo ka bulan gikan Enero hangtod Marso 2015 dunay 97 ka mga sunog nga natala samtang 99 sa miaging tuig.
Mas dako ‘sab og danyos ang mga sunog sa nakalabay nga tuig nga miabot sa dul-an P5 milyones ang danyos samtang karon miabot lang sa P2,992,700.
Apan mas daghan ang mga naangol sa sunog karong tuiga sumala pa sa BFP Cebu City.
Sa tuig 2014 sa bulan sa Enero hangtud Marso wala’y naangol nga fire fighter apan duna’y 15 ka mga sibilyan ang naangol, karong tuiga, tulo ka bombero ug 17 ka sibilyan ang naangol.
Matud pa ni City Fire Marshall Rogelio Bongabong Jr., nga sa mga sunog nga ilang narespondehan duna’y tulo ka mga hinungdan nganong dugay ang ilang pagresponde sa sunog.
Kini naglambigit sa grabeng problema sa trapiko sa dakbayan, gagmay nga dalan sa mga lugar nga nasunogan ug ang bul-og sa mga tawo sa lugar kung asa nahitabo ang sunog nga usahay pasakitan pa ang mga bombero.
Ang “electrical misuse” ug mga batang nagduwa og kalayo ang sagad hinungdan sa sunog karong tuiga.
Ang Cebu City Fire Department nanawagan sa katawhan nga bisan pa man og natapos ang pagsaulog sa “Fire Prevention Month” batasanon g’yud nga susama gihapon sila kaalerto ug mainampingon sa tanang adlaw. (BANAT NEWS)