CEBU, Philippines - Niduaw kagahapon ang officer-in-charge sa Philippine National Police nga si Police Deputy Director-General Leonardo Espina sa headquarters sa Police Regional Office-7 aron sa pagpakigdiyalogo sa mga polis.
Gidayeg ni Espina ang kapolisan sa PRO-7 isip labing maayo lukop nasud.
Si Espina nanawagan sa mga polis sa rehiyon nga padayunon ang ilang kamaayo ug dili kalimtan ang pag-ampo tungod kay kinahanglanon kaayo kini sa ila’ng trabaho.
Sa iya’ng mensahe, siya niingon nga daku’ng kaguol sa kapolisan ang kamatayun sa 44 ka sakop sa Special Action Force sa Mamasapano apan kinahanglan na nga mag-move-on sa mao’ng hitabo. Matud niya nga bisan sakit apan dili angay nga hinumduman sa kapolisan kung giunsa pagkamatay sa SAF 44 kun dili giunsa nila pagkabuhi.
Siya nanawagan nga dili tawgon og Fallen 44 kun dili Gallant 44 tungod kay ilang gipuy-an ang motto sa kapolisan nga Service, Justice ug Honor.
Matud niya nga namatay ang mga sakop sa SAF sa ilang pagserbisyo sa nasud bisan pa man sa kalisud ug kakuyaw sa ilang gisagubang nga operasyon. Dugang niya nga wala mausik ang ila’ng kamatayun tungod kay nadakpan nila ang ilang target. (BANAT NEWS)