CEBU, Philippines - Gikatahapang pusher og shabu nadakpan sa buy-bust operation sa kapolisan sa Barangay Sambag, dakbayan sa Bogo alas 7 pasado ang takna kagahapon sa buntag.
Si Police Officer 2 Alexander Ancao Jr., sa Bogo City Police Station miila sa nadakpan nga mao si Joseph Guevarra, 18, taga Barangay Bungtod sa maong dakbayan.
Matud pa ni Ancao nga si Senior Inspector Ildefonzo Miranda maoy nangulo sa buy-bust operation human sa kapin sa usa ka semana nga pagpaniid sa suspek.
Si Ancao miingon nga napalitan sa ilang kauban ang suspek og balor P400 nga shabu hinungdan sa pagdakop kaniya.
Sa pagrekisa sa dinakpan nasuta nga nagdala pa kini og dugang 23 ka paketeng shabu. (BANAT NEWS)