CEBU, Philippines - Mokabat sa P30 mil ang natulis gikan sa usa ka sales agent sa sitio Alimango, Cantabaco, dakbayan sa Toledo.
Si Josephus Yamas, 34, minyo, taga Sto. Niño, lungsod sa Balamban ang gitulis sa duha ka wala mailhi’ng tulisan nga sakay sa motorsiklo.
Naghatud ang biktima sa ilang mga produkto sa maong lugar diha’ng kalit nga giduol sa usa ka lalaki nga nag- jacket ug nag-full faced helmet nga angkas sa motorsiklo.
Gitionan ang biktima sa.38 kalibre nga armas dayun deklarar og tulis.
Gisakiyo sa tulisan ang kinolekta sa sales agent nga kapin sa P30 mil dayun sibat sakay sa puti nga Honda XRM nga wala’y plate number. (Raymond D. Abarcas/GMR)
Misuway paglugos gidakop
Nasikop sa kapulisan sa Toledo ang usa ka lalaki nga giingong nalambigit sa kasong attempted rape sa barangay Cambang-og siyudad sa Toledo.
Usa ka Richard Alferez, 25, nagpuyo sa barangay Pandong Bato, Toledo ang gidakop nila ni Senior Police Officer 1 Ahmed Barquin ug PO3 Dante Hilo pinasikad sa warrant of arrest for attempted rape.
Giisyu ang maong warrant ni Judge Ruben Altubar sa Regional Trial Court RTC-7 Branch 19 sa dakbayan sa Toledo.
Ang maong dinakpan gitugutan nga makapiyansa og P120 mil alang sa iyang temporaryong kagawasan. (BANAT NEWS)