Nagmotor punggit sa van sa ice plant

CEBU, Philippines - Patay ang usa ka motorista nga napunggit sa delivery van sa ice plant sa Guinsay, dakbayan sa Danao alas 6 pasado ang takna kagahapon sa buntag. Si Police Officer 1 Joseph Oledon, traffic investigator sa Danao City Police Station, niila sa namatay nga si Ronald Roldan, 22, taga lungsod sa Catmon.

Matud ni Oledon nga gikan sa lungsod sa Carmen ang biktima nga kusog nga nagpadagan sa iyang motorsiklo ug paghidangat sa barangay Guinsay namatikdan sa mga nakasaksi nga didto kini nagsubay sa pikas lane sa karsada.

Ang Isuzu delivery van sa Clear Water Ice Plant nga gimaneho ni Julius Colorendo Piscadero, 25, nga taga Zamboanga del Sur gikan sa lungsod sa Liloan ug padulong sa lungsod sa Medellin.

Gikasugat ni Piscadero ang motorsiklo nga giluwanan ni Roldan hangtud napunggit ug nakaingon sa grabe’ng kadaut sa iya’ng kalawasan.

Matud ni Oledon nga si Piscadero nagtinguha unta sa paglikay sa motorsiklo nga gikasugat apan daghang tawo daplin sa karsada ug may nag-parking nga sakyanan.

Grabe’ng kadaut sa ulo ug kalawasan ang naangkon sa biktima hinungdan nga wala na madala sa tambalanan. (BANAT NEWS)