Ex-convict gitusaktusak

CEBU, Philippines - Patay nang napalgan sa iyang anak ang usa ka ex-convict ug manapasay og tubo nga naputos sa samad dinunggaban sa iyang kalawasan napulo ka metros gikan sa ilang balay sa miaging gabii sa Barangay Maharuhay sa lungsod sa Medellin.

Ang namatay naila nga si Mario Sandoval, nga nakaangkon og samad dinunggaban sa iyang lawas ug samad agi sa pinusposan sa iyang nawong.

Base sa imbestigasyon sa kapolisan gikan kini sa tigbakayan sa sitio Bantaaw kay bisperas sa ilang kapistahan ug giingong nakainom kini uban sa mga kahigalaan.

Apan nianang pagkagabii na ang anak nga babaye sa biktima nga gikan nitan-aw og salida sa tv sa silingan nakabantay nga may tawo nga nagbuy-od kilid sa balay sa ilang silingan.

Sa iyang pagsusi ang iyaha diay kadtong amahan nga naputos sa dugo ug wala nay kinabuhi.

Nagtuo ang kapolisan nga giatangan o gisundan ang biktima padulong sa ilang balay sa iyang pag-uli ug didto gidunggab sa pipila ka higayon. Matud pa nga ang biktima bag-o lang gyud nahuman og serbisyo sa iyang sentensya sa bilanggoan ug nakagawas kini karong tuiga lang. (BANAT NEWS)