CEBU, Philippines - Usa ka polis ug opisyal sa homeowners association sa Corinthians Subdivision, sa Sitio Suba Masulog sa Barangay Basak dakbayan sa Lapu-Lapu ang nangaangol human ang duha nagpinusilay tungod sa koneksyon sa tubig kagahapon sa udto.
Si Police Officer 2 Nerro Sarsuelo sa Basak Police Station 4 mibutyag nga ang nagpinusilay mao sila si Ruben Rafols, bise-presidente sa homeownwers association sa nahisgutang subdivision ug si Police Officer 3 Dennis Camonay, nadestino sa Cebu Provincial Police Office.
Base sa imbestigasyon ni SPO2 Allan Pantaleon sa Lapu-Lapu City Police Office –Homicide Section, usa ka residente nga si Lord Wendell R. Mangunat nagpakuyog kang Camonay aron sukmatan si Rafols sa plano niining pagputol sa koneksyon sa ilang tubig.
Sa dihang moestorya na unta si Camonay gikatahong kalit miibot og .45 kalibreng armas si Rafols apan natapi kini sa polis apan nibuto kini ug naigo kini sa iyang wala nga paa. Tungod niini, mibawos pagpusil si Camonay gamit ang iyahang .9mm service firearm ug naigo si Rafols sa ubos nga bahin sa iyahang wala nga paa. Si Pantaleon midugang nga bisan natumba na si Rafols padayong namusil ngadto kang Camonay. Apan wala makabawos pag-usab ang polis tungod kay naigo man usab ang trigger finger niini. Ang duha daling gidala sa Mactan Doctor’s Hospital samtang nakuha sa crime scene ang lima ka basiyo sa kalibre .45 ug usa ka basiyo sa .9mm nga mga bala.
Si Rafols gikatakdang pasakaan og kasong Malicious Mischief ug Direct Assault ug gisubay usab kun duna bay lisensiya ang iyang armas.
Gitahan ni Camonay ang iyahang armas ngadto sa kapolisan nga adunay sulod nga 14 ka bala sa magazine samtang gi turn-over sa Basak Police Station 4 ang .45 nga armas nga adunay nahabiling usa ka bala sulod sa magazine niini. (Christell Fatima Tudtud/EIM)(BANAT NEWS)