CEBU, Philippines – Nabuthan ang 56-anyos nga hubog nga lalaki diha’ng iya’ng gihikap ang .22 revolver nga iya unta’ng paliton sa iya’ng panimalay sa sitio Angasil, barangay Mactan, dakbayan sa Lapu-Lapu.
Ang biktima naila nga si Anecito Tilawan, clerk sa usa ka construction company ug lumad nga taga Iligan City.
Base sa imbestigasyon ni PO3 John Carlo Jocutan sa Lapu-Lapu City Police Office-Homicide Section nakigtagay pa si Tilawan kuyog ang iya’ng mga higala. Duha ka wala mailhi’ng lalaki ang niduol ug nibaligya sa maong armas.
Na-interes si Tilawan ug iya’ng gikuptan ug gi-tan-aw ang armas apan tungod sa kahubog, wala nakaamgo nga may bala ang armas ug kalit nga nibuto igo sa wala’ng pulso.
Dali’ng gidala sa Lapu-Lapu City District Hospital ang biktima samtang nidagan ang duha ka tawo nga nibaligya.
Gisusi sa kapolisan ang duha ka lalaki’ng nagdala sa pusil. – /GMR) (BANAT NEWS)