CEBU, Philippines – Patay ang usa ka lalaki nga nanguryente og isda sa usa ka sapa sa Sitio Malalag, Barangay Ubaub sa lungsod sa Argao.
Ang biktima giila nga si Juan Davis, 51-anyos, residente sa maong dapit.
Matud pa ni Senior Inspector Alejandro Batobalonos nga nahinabi sa Banat News, nagkasabot ang biktima kauban ang iyang mga higala nga manguryente og isda sa maong sapa.
Sumala pa nga miuna ang biktima pag-adto sa sapa sayo sa buntag aron manguryente apan naabtan na lang og tingpaniudto wala pa gihapon mabalik si Davis hinungdan nga gipangita kini sa mga kauban.
Napalgan na lamang kini sa usa ka Johnny Boy Ipugon, higala sa biktima nga naghayang sa tubig samtang nagkupot sa live wire, nasunog usab ang sapot niini sa wala nga bahin sa iyang dughan, ug wala na’y kinabuhi.
Hinuon, gitataw ni PSI Batobalonos nga wala’y angay basulon sa maong hitabo tungod kay aksidente ang nahitabo. – /EIM) (BANAT NEWS)