CEBU, Philippines – Tubig nga gikan sa atabay ang gitan-aw nga posible’ng hinungdan sa pagkasakit sa 20 ka tawo sa bukirang bahin sa dakbayan sa Toledo.
Matud sa chief epidemiologist sa Regional Epidemiology and Surveillance Unit sa Department of Health-7, Dr. Rennan Cimafranca, nga ila pa’ng gisusi ang nakaingon nga gipanghilantan ug nalandig sa tambalanan ang mga molupyo sa sitio Bayabas, barangay Subayon.
Wala pa moluwat og rekomendasyon ang RESU ngadto sa lokal nga kagamhanan tungod kay wala pa mahingpit ang ilang imbestigasyon.
Karong adlawa usab mahibaw-an ang resulta sa water sampling test aron mahibaw-an kung kontaminado ba ang tubig o dili. Nasayran nga sa atabay lang magkuha og tubig sa lain-laing panginahanglanon ang matag banay sa maong lugar.
Ang rectal swab test usa usab sa paagi nga matino ang sakit nga nitakboy sa komunidad.
Gawas sa tubig, gitan-aw usab ang giingong poultry nga hinungdan nga daghang langaw diin nakaingon nga nasakit ang mga tawo.
Una niini gidala sa Toledo City Hospital ang walo sa dul-an 50 ka mga residente nga gihilantan sa niaging adlaw sa maong lugar.
Matud ni Dr. Clyde Vincent Bequilla, medical officer III sa Toledo City Hospital nga ilang gipailawom sa CBC ug typhoid test ang maong mga pasyente.
Dugang ni Bequilla nga ila pang gihuwat ang resulta sa maong mga laboratory examination. – /GMR) (BANAT NEWS)