CEBU, Philippines - Milarga sa nasud sa Japan si Gob. Hilario Davide III aron motambong sa Third UN World Conference on Disaster Risk Reduction nga himuon sa Sendai City, Miyagi Prefecture. Ang maong panagtigom himuon gikan sa Marso 14 hangtud 18, 2015 nga tambongan usab sa liboan ka partisipante gikan sa nagkadaiyang mga nasud.
Ang tumong sa panagtigom mao ang pagtan-aw sa mga pamaagi sa implimentasyon sa post-2015 framework sa DRR.
Ang Pilipinas usa sa signatory sa Hyogo Framework of Action 2005-2015.
Ang maong conference oportunidad sa Sugbo pagpresentar sa local framework niini sa rehabilitasyon ug recovery sa mga biktima sa bagyong Yolanda ug makakat-on usab og mga kaalam sa nahitabong tsunami sa Japan niadtong tuig 2011. Niadtong tuig 2011 ang Sendai City naguba sa tsunami tungod sa kusog kaayong linog.
Ang nagpasiugda sa kalihukan maoy miabaga sa mga galastohan sa mga motambong. Kauban ni Davide didto ang hepe sa Provincial Disaster Risk Reduction and Management Office (PDRRMO) nga si Baltazar Tribunalo.
Si Bise Gobernador Agnes Magpale mao una ang acting governor karon. (BANAT NEWS)