Mga opisyal sa minglanilla gikiha

CEBU, Philippines - Nag-atubang og kaso’ng kriminal ug administratiba ang mga opisyal sa lungsod sa Minglanilla sa buhatan sa Ombudsman-Visayas.

Kini gumikan sa pagtugot nga mademolis ang karaan nga ihawan ug paghimo’g bag-o nga wala’y bidding.

Ang gikiha mao sila si Mayor Elanito Peña, Bise Mayor Robert John Selma, Municipal Administrator Concordio Mejias, Municipal Engineer Nestor Sotes, Deputized Zoning Administrator Engineer Domingo Celeste Enad; Konsehal Samuel Adlawan, Jr., Rajiv Enad ug Roy Nacario, Municipal Treasurer Wilfredo Alidon, Municipal Budget Officer Arabella Bastinen; Thomas Lim Chua ug Joven Hapalad sa PFMC.

Sila si Peter Simon sa Franciscan Friars of Charity, Dazel Selma Ordeniza ug Emmanuel Requirolso Jr. nipasangil nga giguba ang karaang ihawan kay gipagamit sa usa ka pribado’ng kompaniya.

Ila’ng nasuta nga dunay pagbayloay sa luna tali sa munisipyo ug sa Popular Feeds Mill Corporation (PFMC).

Nakadawat usab sila’g report nga nihatag og kwarta ang PFMC ngadto sa munisipyo aron ipalit sa luna nga tukuran sa bag-ong ihawan apan diha’ng gisusi, wala nadawat ang maong kwarta sa munisipyo.

Tungod niini ila’ng gi-kwestiyon ang pagtugot sa gobiyerno sa PFMC sa paggamit sa luna sa karaang ihawan. (BANAT NEWS)