CEBU, Philippines - Tulo ka mga sunog ang girespondehan sa Cebu City Fire Department kagahapong adlawa bisan pa man sa ila na nga gihimong kampanya aron paglikay sa mga sunog.
Usa ka apartment ang nasunog kagahapon sa hapon diha sa Arriola Compound sa Natalio Bacalso Avenue, Barangay Sambag I ning dakbayan sa Sugbo. Si Senior Fire Officer 1 Ariel Balajada ang fire investigator miingon nga ilang nadawat ang alarma alas 2:44 sa hapon ug kini nakontrolar sulod sa 12-minutos.
Gituohang electrical overload ang hinungdan sa sunog base sa pamahayag sa mga testigos. Nagsugod matud pa ang sunog sa usa ka lawak sa ikaduhang andana nga gipanag-iya ni Virginia Ngosiok.
Gawas niini, duha ka grassfires ang gitubag sa kabomberohan sa South Reclamation Properties ug Monterrazas de Cebu tungod sa grabeng kainit sa panahon. Si Cebu City Fire Marshall Rogelio Bongabong Jr., nagtuo nga posibleng upos sa sigarilyo nga ilabay sa mga motorista nga miagi sa maong dapit ang hinungdan niini o ba kaha dunay nagsunog og basura.
Mipasidaan ang kabomberohan sa publiko nga di pasagdan nga nakasaksak ang ilang appliances ug electronic gadgets kun wa gamita sanglit usa kini sa sinugdanan sa sunog. (BANAT NEWS)