CEBU, Philippines – Gihimakak ni Bokal Grecilda Sanchez ang pasangil ni Mayor Nelson Garcia sa lungsod sa Dumanjug nga gigukod siya tungod kay dili siya kaalyado sa partido niini.
Niining ulahi lang si Garcia mipasangil nga gidali-dali ang desisyon sa iyang kaso nga gisang-at ni Bise Mayor Efren Gica ngadto sa committee on complaint and investigation sa Hunta Probinsiyal tungod kay dili siya kaalyado sa administrasyon karon.
Matud ni Garcia nga si Sanchez mao ang nangusog nga masuspenso siya og unom ka buwan bisan og duna pa siya’y mga motion nga giduso.
Apan si Sanchez miingon nga base sa Section 68 sa Local Government Code ang apelar dili mahimong makapugong sa pagpatuman sa usa ka desisyon aron mamahimo kining pinal o executory.
Apan kun sa higayon nga mamatud-an sa apelar nga nasayop ang unang desisyon, mahimo siyang pabalikon sa trabaho ug bayran ang sweldo nga wala mahatag atol sa iyang suspensiyon.
Ang gikahiubos ni Garcia mao ang wa paghatag sa lima ka kasong iyahang gipasaka batok kang Gica wala hatagi og pagtagad sa committee. Apan si Sanchez mipasabot nga ang kaso ni Garcia maoy nag-una mao nga giuna nila kini og atiman.
Si kanhi gobernador Pablo Garcia nagkanayon nga dihang siya pa ang gobernador sa probinsiya ug sa iyang anak nga si kanhi gobernador Gwendolyn Garcia wala sila’y gipasuspenso nga mayor.
Ang kanhi gobernador mipasangil nga gipanggukod ang mga dili kaalyado sa Liberal Party (LP) karong mga panahona.
Gihimakak kini ni Gobernador Hilario Davide III kay matud niya dunay nahimong kalapasan hinungdan nga dunay mireklamo ug gikasohan. – /EIM) (BANAT NEWS)