CEBU, Philippines - Ayuhon sa kagamhanan sa dakbayan sa Mandaue ang naguba nga karsada sa barangay Looc tungod sa mga container vans nga iya sa Oriental Port and Allied Services Corporation (PASCOR).
Matud ni Roger Paller, information officer sa Mandaue City Hall, nga dili ang pagkanselar sa permit sa container yard ang solusyon sa reklamo sa mga residente kun dili ang pag-regulate ug pag-monitor sa operasyon.
Ang ayuhon nga karsada mao ang Juan M. Ceniza nga nakaangkon og grabe’ng kadaut tungod sa kanunay nga pag-agi sa 20 ug 40-footer container van nga guyuron sa prime mover truck.
Si Dr. Danilo Dionson nga usa sa mga nagpuyo sa maong dapit una na nga nagpadala og sulat ngadto kang Mayor Jonas Cortes sa pagpadangat sa iyang reklamo labot sa guba nga dalan ug kanunay nga pagbaha sa ilang lugar tungod sa dili maayong kahimtang sa kanal. Gihangyo usab ni Dionson si Looc barangay kapitan Cesar Cabahug nga dili na ipa-renew ang business permit sa OPASCOR. (BANAT NEWS)