CEBU, Philippines – Personal nga giduaw ni Police Senior Superintendent Conrad Capa, officer-in-charge sa Cebu City Police Office ang Barangay Inayawan kalabot sa report nga mao kini ang kinadaghanan og mga kaso sa pagpamusil gikan Enero sa miaging tuig hangtud karong Pebrero ning tuiga.
Usa sa gitumbok nga hinungdan sa pagsaka sa kaso sa pusil sa Barangay Inayawan mao ang pagsaka sa problema sa ginadiling drugas.
Sigon pa ni Kagawad Rustico Ignacio nga daghan nang mga tawo sa ilang barangay nga wala niya mailhi. Matud niya, sukad nga midaghan ang dayo migrabe ang problema sa ilegal nga drugas sa ilang lugar.
Tungod niini gimanduan ni Capa ang kapolisan nga mas hingusgan pa nila ang pagpahigayon sa checkpoint ug gipadugangan ang walo ka polis og napulo pa ka polis aron motabang sa pagmenus sa krimen.
Mitambong sa maong meeting sila si Konsehal Dave Tumulak ug uban pang hepe sa nagkalain-laing unit lakip na ang Homicide Section.
Base sa record sa Homicide Section, miabot og 34 ka mga kaso ang pagpamusil apan lima lang ka suspek ang nailhan sa kapolisan, 16 niini ang namatay. Si Capa mosusi usab sa report nga nagbinawsanay ang mga pamilya sa mga nangamatay. – /EIM) (BANAT NEWS)