CEBU, Philippines - Nasikop sa mga sakop sa Criminal Investigation and Detection Group-7 ang usa ka giila’ng most wanted sa lungsod sa Liloan sa terminal sa lungsod sa Consolacion pasado alas 10 sa nakalabay nga buntag.
Ang nasikop naila nga si Brian Ampaso, hingkod nga lumad nga taga lungsod sa Liloan.
Matud ni Chief Insp. Rene Kyamko, hepe sa CIDG-Cebu, nga niadto pa’ng Enero tuig 2013 nakombikto sa kaso sa drugas ang akusado ug wala na nakit-i sa kapolisan.
Nakit-an si Ampaso sa terminal hinungdan nga dali nilihok ang mga awtoridad.
Nakuha sa mga awtoridad gikan sa posesyon ni Ampaso ang usa ka .380 caliber pistol nga duna’y tulo ka bala.
Si Kyamko niingon nga ika-napulo nga most wanted person si Ampaso sa Liloan ug wala’y piyansiya nga girekomendar ang korte sa iya’ng kaso.
Gitanggong na sa Cebu Provincial Detention and Rehabilitation Center si Ampaso. (BANAT NEWS)