Drug den gironda, 1 patay

CEBU, Philippines – Usa ang patay sa pinusilay  atol sa drug raid sa duha ka drug dens sa bukirang bahin sa Sitio Tak-an, Barangay Kawit lungsod sa Medellin.

Target sa kapulisan nga sikopon si Allan Gallardo, nagpuyo sa maong lugar, usa ka level 2 drug pusher nga gikatahong maoy nagpadagan  sa maong drug den.

Matud pa ni Senior Police Officer 2 Jovito Aballe ang desk officer sa Medellin Police nga nahinabi sa Banat News pag-abot sa raiding team nanukol ang mga kalalakin-an sa maong dapit. Ang namatay naila nga si Wilfredo Bactol, 35, taga Maslog, dakbayan sa Danao samtang nakasibat si Gallardo.

Ang drug den nahimutang sa kalibonan ug nasilongan sa mga punoan sa mga kahoy.

Matud pa nga dunay ‘spotter’ ang maong grupo ug dali nga nakasinggit sa mga kauban nga dunay mga polis.

Sumala pa nga sunod nadunggan sa mga polis mao ang butobuto sa armas  hinungdan nga mibawos og pabuto ang grupo sa hepe sa Medellin Police nga si Senior Inspector Christopher Fernandez.

Gibanabanang  dunay napulo ka tawo diha sa sud sa duha ka drug dens dihang miabot ang mga polis apan tungod kay nabantayan ang mga polis nakadagan kini.

Sulod sa drug den nagpasad ang daghang mga tin foils diin nakakuha sab og mga gitohoang drugas ang kapulisan.

Narekober sa mga polis ang usa ka .357 revolver, usa ka .38 revolver nga duna’y upat ka mga bala, duha ka improvised .22 rifles, mga bala nga jolin ug duha ka dinamita.

Kagahapon sa buntag ang pamilya ug asawa sa namatay ang mibisita sa kapulisan aron pagkuha sa patay nga lawas ni Bactol. Sumala pa ni Aballe  nga miingon ang asawa ni Bactol nga milakaw sa ilang balay ang iyang bana sa nakalabay nga semana ug nananghid nga moadto sa Kawit kay duna kini trabahoon nga koral.

Nahibulong ang asawa nga naapil kini sa ilegal nga kahihokan nga unta mason man si Bactol. – /EIM) (BANAT NEWS)