CEBU, Philippines - Naghikog ang usa ka lalaki nga gikatahong may nervous breakdown tungod sa giingo’ng tawo nga gustong’ mopatay kaniya sa niaging buntag sa lungsod sa Dumanjug.
Ang nagpakamatay naila nga si Condrado Anticamara, 48, taga Tapon, Dumanjug, kinsa napalgan na lang sa iyang silingan nga nagbitay na sa punoan sa lubi.
Naghikog ang biktima pinaagi sa paghigut og upat ka metros nga pisi sa iyang liog ug gigaid ang pikas tumoy sa lubi ug niambak.
Usa ka Mario Taking ang nakakita nga nagbitay na si Anticamara pasado alas 9:00 sa buntag hinungdan nga nanawag kini og tabang.
Niresponde ang kapolisan kauban sa usa ka kawani sa Rural Health Unit.
Giingo’ng naka-estorya pa si Anticamara nga maghikog sa wala pa ang insidente apan wala motuo ang mga silingan ug mga kaliwat. (BANAT NEWS)