CEBU, Philippines - Gihimakak ni Pablito “Boby” Nalzaro, usa ka broadcast journalist ang pasangil nga gisang-at batok kaniya ni kanhi kongresista Tomas Osmeña.
Matud niya nga ang artikulong napublikar sa usa ka local daily newspaper niadtong Oktubre 25, 2014 di pagpangdaot ni Osmeña.
Gusto ni Nalzaro nga ipahunong una ang pagpahigayon og preliminary investigation sa libel case nga gipasaka ni Osmeña batok kaniya sa Office of the Cebu City Prosecutor nga gikuptan karon nila ni state prosecutors Gandhi Truya ug Maria Theresa Casiño.
Matud niya nag-file siya’g mosyon sa Office of the Regional Prosecutor aron hangyoon si Regional State Prosecutor Fernando Gubalane nga motudlo og laing prosecutors nga moresolba sa maong kaso. Gusto ni Nalzaro nga dili si Casiño ug Truya tungod sa isyu nga bias.
Kahinumduman nga ni-file si Nalzaro og motion for voluntary inhibition batok sa duha apan wala mosugot ang duha.
Matud pa ni Nalzaro nga si Truya anak sa usa ka police official kaniadto nga iyang gikomentaryohan samtang si Casiño matud pa nakadawat og financial assistance kang Osmeña dihang napusilan kini diha sa Palace of Justice. (BANAT NEWS)