CEBU, Philippines – Gipalagpot na sa ilang trabaho ang duha ka traffic enforcers sa Traffic Enforcement Agency of Mandaue (TEAM) nga gipasanginlan nga nangilkil og kuwarta sa gidakop nilang langyaw nga nagmaneho sa iyang sakyanan kuyog sa iyang hinigugmang Cebuana.
Si Roger Paller nga maoy Public Information Officer (PIO) sa Mandaue miingon nga mismo si Mayor Jonas Cortes ang nagmando sa pagpataktak kanila ni Ringo Penades ug Armand Gallardo base sa rekomendasyon sa TEAM.
Ang mipasangil nga langyaw kinsa nga wala magpaila giingon nga nakahimo og kalapasan sa trapiko dihang nag U- turn kini sa intersection sa karsada sa reclamation area niadtong adlaw nga gipahigayon ang Sinulog Festival sa Dakbayan sa Sugbo.
Gihatagan og gibug-aton sa traffic management board ang sayop nilang nahimo sama sa wa paghatag og citation ticket sa maong langyaw nga karon mipasangil kanilang ilang gikilkilan og P1,500.
Hinuon giklaro ni Mandaue City Legal Officer Giovanni Tianero nga wa g’yud maestablisar ang pasangil nga pagpangilkil bisan dunay gialegar nga nakuhang video nga maoy gibasehan sa imbestigasyon batok sa duha. Ang video nag-viral sa networking sites apan wala makuhai ang giingong aktwal nga pagdawat sa duha sa maong kwarta. – /EIM) (BANAT NEWS)