CEBU, Philippines - Gikasagmuyo og maayo sa Mandaue City Schools Superintendent nga si Dr. Virginia Zapanta ang paglugwa sa balita sa mga pangalan sa mga eskuylahan diin magtudlo ang duha nila ka magtutudlo nga gidakop sa kapolisan sa kasong adultery sa miaging Biyernes.
Si Zapanta dihang nahinabi sa Banat News miingon nga naduhig g’yud ang pangalan sa mga tunghaan diin magtrabaho ang duha ka public school teachers tungod kay ginganlan man ang mga tunghaan.
Matud pa niya nga tungod sa maong hitabo iyang pulihan ang duha sa mga klase nga ilang gidumala aron dili maapektahan ang mga bata.
Ang opisyal midugang nga dili pa sila mohimo og lakang batok sa duha tungod kay paabuton na lang nila ang linugdangan sa kaso nga gipasaka sa korte.
Ang babaye nga magtutudlo asawa sa usa ka polis nga sakop sa Mandaue City Police Office (MCPO) maoy nakadakop sa duha nga nagdulog sa kuwarto mismo sa magtiayon diha sa ilang balay niadtong Biyernes.
Si Senior Police Officer 1 Bryan Batiquin sa Liloan Police Station nagkanayon nga nagpa-blotter usab ang gidakop nga magtutudlong babaye tungod atol sa pagsikop kanilang duha sa maestro nahanaw ang pipila niya ka mga gamit ug kuwarta.
Ang magtiayon duha ka tuig nang wala mag-ipon ug dunay Barangay Protection Order (BPO) sa barangay kapitan sa ilang dapit ang babaye gikan sa reklamanteng polis.
Dunay upat ka mga anak ang magtiayon nga nag-edad pa lang og 10, 8, 5 ug ang kamanghuran 3-anyos pa ang panuigon.
Ugmang adlawa ipasaka ang kaso sa korteng adultery batok sa duha. (BANAT NEWS)