CEBU, Philippines - Nipahimangno ang kapolisan sa publiko sa bag-ong modus sa mga mangunguot sulod sa public utility jeepneys (PUJ).
Kini human usa ka pasahero sa PUJ nga rota nga 13C ang nahinabi sa Banat News ug nitug-an sa iyang nasugatan nga modus sa dili mominus tulo ka lalaki.
Sumala pa nga hadlukon sa usa ka lalaki ang usa ka pasahero nga duna’y uhipan sa iyang sapatos nga nidagan sa karsones aron magkagubot ang mga pasahero ug malipat nga sila gikuotan na.
Ang hepe sa Police Community Relations (PCR) sa Cebu City Police Office, Chief Insp. Enrique Belciña, niingon nga karon pa sila nakadungog sa maong modus gawas sa laglag barya ug papilitan og chewing gum ang buhok sa pasahero.
Si Belciña nipahimangno sa publiko nga magmabinantayon sa tanang panahon samtang mosakay sa PUJ. “Careful gyud ta and be attentive sa imong mga gamit,” sumala pa ni Belciña. Gihulagway sa tinubdan sa Banat News nga desente kaayo ang mga lalaki nga mosakay sa PUJ ug dili katuohan nga mga badlungon. (BANAT NEWS)