CEBU, Philippines – Usa ka ancestral house nga gihimo na’ng paabanganan ang gilamoy sa kayo pasado alas 3 sa niaging kadlawon sa sitio Tambis, Sambag 2 ug nagbilin og P150,000 nga danyos.
Si SFO4 Jovito Abelgas sa Cebu City Fire Department niingon nga nadawat ang alarma alas 3:20 sa buntag ug nakontrolar paglabay sa 30 minutos.
Sa inisyal nga imbestigsyon nasayran nga nagsugod ang sunog sa ikatulo nga andana sa maong balay nga gipanag-iya ni Tony Allego.
Si Abelgas niingon nga dali kaayo nga nakakatap ang kayo ug sa pag-abot sa mga bombero halos dili na matabang ang sunog nga napasaka sa ikaduhang alarma.
Wala nakatabok sa laing balay ang kayo gumikan sa firewall ug wala’y natala nga naangol sa maong hitabo.
Ang maong balay gitukod niadto pa’ng 1962 ug sila nagduda nga posibleng problema sa electrical ang hinungdan sa sunog apan hinuon nagpadayun pa ang ilang gihimo nga imbestigasyon. – /GMR) (BANAT NEWS)