CEBU, Philippines - Kadto’ng polis sa lungsod sa San Fernando nga nadakpan ug nakuhaan og mga armas nga wala’y lisensya pasakaan g’yud og kaso’ng kriminal.
Mao kini ang kamandoan ni Police Regional Office-7 direktor Prudencio Tom Bañas nga si PO2 Romeo Bolaño pasakaan g’yud og kaso uban sa upat niya ka kaubanan.
Gawas sa pagpasaka og kaso’ng kriminal, gimando usab ni Bañas nga ipaimbestigar ang hepe sa San Fernando Police nga si Chief Inspector Sarah Jane Recla agi sa gitawag nga command responsibility. Si Bañas miingon nga salikwa-ot kaayo paminawon nga samtang daghang namatay nga mga sakop sa PNP Special Action Force (SAF) sa pagtuman sa ilang katungdanan, apan si PO2 Bolaño sab nadakpan kay nagpabadlong.
Si PO2 Bolaño nasikop sa mga sakop sa Special Weapons and Tactics (SWAT) ug Criminal Investigation and Detection Group-7 (CIDG) samtang paingon unta nga manaog sa barko sa Cokaliong Shipping Lines. Ang armas nga nakuha gikan kang PO2 Bolaño ug sa iyang mga kauban gikataho nga dili lisensyado.
Ang polis ang iyang mga kauban nasikop human gi-alarma kini sa tripulante sa barko ngadto sa ilang kapitan nga mao sa’y mitawag ug nangayog tabang sa CIDG-7. Matud ni Bañas nga magpaabot pa sila sa rekomendasyon sa CIDG-7 alang sa kaso’ng administratiba nga ipasaka batok ni PO2 Bolaño.
Kauban ni PO2 Bolaño nga nasikop mao sila si Dexci Gomonet, Raniel Comandante, Benhur Gamutan ug Joseph Lagura.
Si PO2 Bolaño nakuhaan og .9mm pistol. Ang iyang mga kauban nakuhaan og duha ka 22 kalibre nga rifle, usa ka .9mm pistol, usa ka .40 caliber pistol ug usa ka 8mm pistol ug mga bala. (BANAT NEWS)