CEBU, Philippines - Gisusi sa Department of Environment and Natural Resources ang Maghaway – Tapul dumpsite sa dakbayan sa Talisay aron pagsuta sa posible’ng kalapasan.
Ang enforcement division personnel sa DENR-7 ang nipahigayun og ocular inspection niadtong Enero 28.
Matud sa tigpamaba sa DENR-7, Ed Llamedo, nga dili ilegal nga mag-operate og landfill apan may sundon nga environmental requirements aron sa pagprotehir sa kalikupan.
Lakip sa imbestigasyon ang pag-inspeksyon sa mga pasilidad sa landfill, pag-obserbar sa waste handling ug segregation, care ug maintenance, ug waste water treatment.
Apan matud ni Llamedo nga wala pa nahuman ang tibuok imbestigasyon sa mao nga landfill operation ug modagan pa ngadto sa tulo o lima ka adlaw.
Human sa imbestigasyon, magpatawag sila og usa ka technical conference kauban ang mga opisyal sa dakbayan sa Talisay ug barangay Tapul ug Maghaway.
Paminawon ang mga komento sa mga nalambigit mahitungod sa resulta sa imbestigasyon aron masuta sa matag sektor ang sunod nga lakang nga ilang himoon alang sa kaayuhan sa kalikupan. (BANAT NEWS)