CEBU, Philippines - Ang dakbayan sa Sugbo mihatag og “advance payment” nga kapin sa P4.3 milyones ngadto sa usa ka kontraktor nga wala sunda ang gilatid sa Government Accounting and Auditing Manual.
Si City Auditor Cymbeline Celia Chiong-Uy mipahinumdom ni Mayor Michael Rama nga dili tukma nga hatagan og pasiuna nga bayad ang kontraktor kun wala kini makasumiter sa gikinahanglang dokumento.
Ang balaud nagtugot nga ang kagamhanan makahatag og “advance payment” nga dili molapas sa 15 porsiyento sa kinatibuk-an nga kantidad sa kontrata basta makompleto ang mga papeles. Sa pakisusi nga gihimo sa Commission on Audit (COA) nasayran nga ang dakbayan sa Sugbo mibayad og P4,377,653 ngadto sa Armed Builders and Supply isip advance payment nga katumbas sa 15 porsiyento sa P29.2 milyones nga kontrata sa upat ka proyekto sa dakbayan.
Ang mga proyekto mao ang paghimo’g divisions ug bodega sa opisina sa General Service Office sa City Hall, pagtukod og gamay’ng tulay sa Barangay Bacayan, unom ka classrooms sa Barangay San Jose ug laing 28 ka classrooms sa Barangay Pahina Central.
Matud sa COA nga nakahimo g’yud og kalapasan ang dakbayan sa Sugbo sa lagda nga gilatid sa Presidential Decree 1445. Ang balaod naglatid nga ang kontraktor kinahanglang dunay “Standby Letter of Credit” sa bangko aron magsiguro nga kun dili niini humanon ang proyekto makuha pagbalik sa kagamhanan ang gibayad nga advance payment. Ang COA miawhag ni Mayor Rama nga dili na usbon ang paghatag og advance payment sa mga kontraktor kun dili niini makompleto ang gikinahanglan nga mga dukomento. (BANAT NEWS)