CEBU, Philippines - Magporma na ang kagamhanan sa siyudad sa Sugbo og counterpart project team alang sa social impact management ug ingon man sa detalyadong engineering design sa Cebu-Bus Rapid Transit project.
Sa miaging sesyon sa konseho sa siyudad sa Sugbo, giaprobahan ang project proposal ni Atty. Rafael Yap kinsa maoy gitudlong Cebu-BRT czar.
Gipangamahanan ni Konsehal Nestor Archival ang maong project proposal tungod siya maoy tsirman sa City Council’s committee on transportation and utilities.
Sumala pa sa resolusyon ni Archival, tinguha sa BRT ang pagsulbad sa problema sa public transportation sa siyudad sa Sugbo.
Matud ni Yap nga ang Department of Transportation and Communications nanginahanglan og technical personnel nga mosuporta gikan sa local government unit sa pag-implimentar sa maong proyekto. Tungod niini, nagkinahanglan og lima ka civil engineers ug lima ka psychology o social work graduates ang siyudad aron pagbuhat sa social impact management and detailed engineering design. Ang siyudad mogasto og P5.5 milyones aron pagsweldo niining mga technical personnel sulod sa usa ka tuig.
Responsibilidad sa mga technical personnel ang paghatag og technical ug administratibong suporta ngadto sa mga consultants sa DOTC ug pag-implement sa approved plans alang sa maong proyekto. Sila sab ang mamahimong liaison tali sa city government, DOTC ug sa World Bank. (BANAT NEWS)