CEBU, Philippines - Magtagbo ang Mactan-Cebu International Airport Authority (MCIAA) ug Philippine Air Force (PAF) labot sa pagbalhin sa pasilidad aron matukod ang airport terminal 2.
Ang lote nga nahimutangan sa 17 ka istraktura sa PAF mao ang tukuran sa terminal.
Atol sa tigum sa MCIAA Board sa Kapitolyo kagahapon, gipresentar ang giplano’ng proyekto.
Matud ni Engineer Nigel Paul Villarete, general manager sa MCIAA, nga nakig-coordinate sila karon sa PAF ug Department of National Defense ug sa uban pa’ng ahensiya’ng hingtungdan aron masugdan sa daling panahon ang proyekto.
Gibutyag ni Villarete nga sulod sa 10 ka buwan ang kontrata sa pagbalhin ug pagtukod og bag-ong building sa PAF apan mahimo nila kini sulod lang sa unom ka buwan.
Matud ni Villarete nga anam-anamon pagguba ug pagtukod ang bag-ong mga istraktura sa PAF.
Sayo niini’ng buwana ang MCIAA mihatag na og pagtugot sa Pamatong Grandby Joint Ventures nga maoy contractor sa replication sa mga istraktura sa PAF sa pag-mobilize sa ilang ekipo sulod niining buwana.
Ang proyekto gibana-bana’ng mokabat sa P800 milyones apan ang Pamatong Grandby niduso sa ilang bid nga P670 milyones.
Niadtong Disyembre 29, 2014 giluwatan sa MCIAA ang notice of award. (Brenda D. Batuto/GMR)(BANAT NEWS)