CEBU, Philippines - Gitakda na karong Pebrero 6 ang pormal nga donasyon sa luna nga yuta nga gipanag-iya sa Kapitolyo nga nahimutang sa Sudlon-Lahug, dakbayan sa Sugbo ngadto sa Department of Education.
Si Dr. Arden Monisit, provincial schools division superintendent, nibutyag nga si Gob. Hilario Davide III makigpirma na sa memorandum of agreement (MOA) alang sa deed of donation sa lote sa maong petsa.
Gilauman nga si DepEd Secretary Armin Luistro motambong sa kalihukan.
Matud ni Monisit nga daku kaayo og tabang ngadto sa DepEd ang pagdonar sa lote.
Walo na ka tuig ang DepEd sa probinsiya nga nag-okupar sa 6,148 metro kwadrado nga luna nga gipanag-iya sa probinsiya sa nahisgutang lugar. Ang DepEd nagplano sa pagpaayo sa ilang building karon ug matuman kini kung pormal na’ng madonar ang lote.
Isip tugbang, ang DepEd-Cebu ang moabaga sa pagpaayo ug pag-atiman sa building.
Gibutyag usab ni Monisit nga ang Provincial School Board (PSB) niaprobar na sa P147 milyones nga budget alang sa 2015.
Lakip niini ang P39 milyones nga counterpart sa Kapitolyo alang sa Gabaldon restoration ug construction sa high school building ubos sa pagtabang sa Ramon Aboitiz Foundation Inc.
Nalakip sab ang P5 milyones nga gahin sa pag-host sa probinsiya sa 2015 Central Visayas Regional Athletics Association (CVRAA) Meet karong Pebrero 22 nga ipahigayun sa lungsod sa Balamban ug ang P4.8 milyones nga budget alang sa provincial delegates. (BANAT NEWS)