Sinulog sa Toledo ugmang adlawa

CEBU, Philippines - Gikatakdang himuon ang Sinulog sa Toledo ugmang adlawa , Enero 25, 2105 ug adunay Sinulog Parade nga salmotan sa nagkadaiyang eskuylahan ug mga kompaniya ug ahensya sa gobiyerno aron mas sadya ang selebrasyon  sa kapistahan sa Balaang Bata nga si Senyor Sto. Niño.

Gilauman nga adunay mga balikbayan, mga langyaw ug mga bisita gikan sa mga silingan nga kalungsoran ang mosaksi sa Sinulog sa Toledo.

Gikan sa Toledo City Vocational National School magsugod ang parada sa mga contingents ug matapos kini sa atubangan nga bahin sa St. John de Sahagun Parish.

Matud ni Parish Pastoral Council president Mayet  Redoble nga sa pagkakaron gamay palang ang nagpalista sa musalmot nga mga pribadong mga kompaniya ug mga tunghaan sa dakbayan.

Apan dugang ni Redoble nga posible sa adlaw’ng Domingo mapun-an pa ang moapil sanglit kutob sa alas 10:00 sa buntag sila modawat og entry kay sugdan ang parada ala-1:00 na sa hapon.

Ang maong parada sa sayaw dili kompetisyon kundili paghalad kang Senyor Sto. Niño.

Si Superintendent Ricky Delilis , hepe sa Toledo City Police Station, miingon nga adunay i-deploy nga dili momenos  10 ka polis sa kadalanan. (Raymond Abarcas/EIM)(BANAT NEWS)

 

Show comments