CEBU, Philippines – Nadagit sa tulisan ang P200 mil nga kwarta sa negosyante og karne’ng baboy sa sitio Lawis, barangay Luray Dos, dakbayan sa Toledo sa nakalabay’ng adlaw.
Ang biktima nga nidangop sa buhatan sa kapolisan mao si Jhon Flores nga taga lungsod sa Tuburan. Pauli na si Flores gikan nangolekta sa halin sa baligya nga karne’ng baboy kuyog ang asawa ug anak sakay sa ilang multicab.
Pag-abot sa nahisgutang lugar kalit nga nibutho ang usa ka motorsiklo nga gisakyan sa tulisan ug nibabag sa dalan dayun bunot sa armas ug gition sa biktima.
Tungod sa kahadlok, dali nga gitunol sa biktima ang kwarta dihang nideklarar og tulis ang tulisan kinsa dali sab nga nipasutoy sa motorsiklo human nakuha ang kwarta.
Samtang gi-holdup ang usa ka lending collector sa barangay Poog, dakbayan sa Toledo.
Matud ni Eleuterio Gahub Jr. collector sa usa ka lending sa Banawa, dakbayan sa Sugbo, nga nangolekta siya sa tindahan nga ilang gipautang dihang kalit duha ka lalaki nga sakay og motorsiklo ang niabot ug ang usa nanaug ug niti-on kaniya og armas.
Gikuha sa mga tulisan ang nakolekta nga kwarta sa biktima sa wala matino nga kantidad.
Wala pa makontento ang mga tulisan gidagit og apil ang service nga motorsiklo sa biktima dayun biya sa lugar. – /GMR) (BANAT NEWS)