CEBU, Philippines – Tulo ka job order (JO) employee sa munisipyo sa Argao ang gikatahong positibo sa gipahigayong surprise drug test nga gihimo sa Cebu Provincial Anti-Drug Abuse Commission (CPADAC) kagahapon sa buntag.
Sa report sa Provincial Public Information Office nga ipaubos pa nila sa confirmatory test ang maong tulo kansang mga pangalan wala ibutyag.
Ang hepe sa CPADAC nga si Joey Herrera nagkanayon nga ang maong JO dili una i-renew ang ilang kontrata samtang gipaubos pa sa confirmatory test.
Giingong 60 ka kawani sa munisipyo ang gikatakda unta’ng ipaubos sa drug test kagahapon apan 56 lang ang na-drug test tungod kay naatol nga ang upat dunay on leave ug absent.
Samtang laing surprise drug test ang gipahigayon usab kagahapon diha sa Isidro Kintanar Memorial Hospital sa nahisgutang lungsod.
Si Herrera mibutyag nga negatibo ang resulta sa drug test sa 16 ka kawani sa maong tambalanan.
Apan giingong 20 ka kawani unta sa tambalanan ang gikatakdang ipaubos sa drug test apan tulo niini ang nausab ang shifting sa duty ug ang regular nga utility worker giingong miikyas.
Ang maong utility worker ang ipaimbistigar kini sa Committee on Discipline and Investigation (CODI). – /EIM) (BANAT NEWS)