CEBU, Philippines – Grabeng naangol ang usa ka tawo nga biktima sa pagpanunggab sa nahubog nga silingan sa Sitio Mahayahay, Barangay Gabi, lungsod sa Cordova alas 10 pasado ang takna sa niaging gabii. Si SPO1 Laurencio Wagwag sa Cordova Police Station niila sa biktima nga si Francisco Estrera, 30-anyos, ug ang nagdunggab mao si Anthony Pongasi, 27. Matud ni Wagwag nga nagbarug lang ang biktima sa gawas sa ilang panimalay dihang nahidangat si Pongasi nga hubog kinsa nilipot sa luyo ug sa wala’y igong hinungdan kalit lang nanunggab.
Ang biktima dali’ng gihatud sa iyang sakop sa pamilya sa Vicente Sotto Memorial Medical Center sa dakbayan sa Sugbo.
Si Wagwag miingon nga nipauli lang sa ilang panimalay ang suspek ug ilang nadakpan sa follow-up operation. – /GMR) (BANAT NEWS)