CEBU, Philippines - Suroyon sa kadagkoan sa Cebu City Hall ang mga balay-patigayon daplin sa Sinulog carousel route aron masiguro nga ipagamit nila ang ilang mga pansayan sa publiko atol sa pagpahigayon sa Sinulog Grand Parade ugma.
Si Konsehal Richie Osmeña nga maoy gitugyanan ni Mayor Michael Rama sa pagsuperbisar sa crowd control ingon man sa mga sakop sa media, miingon nga magkuyog sila si Cebu City police director Conrad Capa aron suroyon nila ang mga balay patigayon.
Hangyuon nila ni Konsehal Osmeña ang mga tag-iya ug tagdumala sa mga balay-patigayon nga mopagamit sila sa mga pansayan alang sa publiko bisan atol lang sa kalihukan sa Sinulog.
Nahibaw-an nga sa miagi’ng Fiesta Señor, dunay mga balay-patigayon nga wala mopagamit sa ilang mga pansayan sa mga dili nila kustomer. (Rene U. Borromeo)(BANAT NEWS)