CEBU, Philippines – Wala’y re-routing nga ipatuman sa mga pangpublikong sakyanan sa dakbayan sa Mandaue karong Biyernes atol sa Traslacion sa imahen sa Senior Santo Niño. Si Edwin Ermac, operation chief sa Traffic Enforcement Agency of Mandaue (TEAM), miingon nga mahunong lang ang mga sakyanan atol sa paglabay sa karo.
Si Fr. Expedito Torrevillas, Parochial Vicars sa National Shrine of Saint Joseph, miingon nga gitakda sa alas 9 sa buntag mahidangat sa utlanan sa barangay Mabolo ug Subangdaku ang imahen uban sa imahen sa Birhen sa Guadalupe.
Paghidangat sa imahen sa simbahan, sugdan dayun ang welcome mass.
Samtang himuon ang pagbilar sa imahen mao usab ang higayun nga tugutan ang mga deboto sa paghalok sa imahen. Alas 4 sa kadlawon sa Sabado himuon ang misa ug human niini sugdan ang foot procession paingon sa Ouano Wharf sa barangay Looc diin manukad ang fluvial procession.
Si San Roque barangay kapitan Boy Miranda ang gitahasan ni Rama nga mangulo sa fluvial ug procession ug wala na’y mga kadete nga mo-cordon nga mosugat ni Señor Santo Niño sa Pier 1 gikan sa Mandaue.
Giklaro ni Miranda nga hapsay na ug andam na ang 200 ka unipormado nga tawo nga mosugat ug mohatud sa imahen paingon sa Basilica. – /GMR) (BANAT NEWS)