CEBU, Philippines – Gikonsiderar sa mga deboto sa Senyor Santo Niño de Cebu nga kini magmilagro mao nga daghan nang mga tawo, dili lang mga taga Cebu ang nanaad nga bisan kausa lang sa usa ka tuig makasimba sila ug mangaliya diha sa Basilica Minore del Sto. Niño.
Ang uban kanila tuyoon g’yud ang pag-anhi sa Sugbo aron mangayo og pabor, tabang, ug ang uban milagro sa imahen sa Balaang Bata.
Usa na kanila si Marilou Sanchez, 38, kinsa nagpasakop sa Cofradia del Santo Niño de Cebu.
Niadtong tuig 2008, ang amahan ni Marilou na-diagnosed nga dunay lung cancer, usa ka pagsuway nga gihulagway ni Marilou nga dili niya makalimtan sa tibuok niyang kinabuhi.
“Hapit ko moligid sa altar sa Pilgrim Center. ‘Santo Niño, Santo Niño, Santo Niño, tabangi intawon ko,” matud pa niya usa ka adlaw human niya nahibaw-an ang diagnosis sa iyang amahan.
Sumala pa niya, duha ka mga doctor ang mihiling sa iyang amahan ug silang duha pulos miingon nga dunay kanser sa baga ang iyang amahan.
Apan nagduda pa g’yud siya niini mao nga iyang gidala iyang amahan sa Manila aron mangita og third opinion, apan mao gihapon ang resulta sa diagnosis.
Tungod niini, ang iyang pamilya nagkasabot nga ipaubos sa laparoscopy ang ilang amahan, usa kini ka medical procedure nga maisip lang nga sama sa “band-aid” surgery.
Apan napakyas ang maong tinguha tungod kay gipahibalo sila sa hospital nga gipadala sa Singapore ang ilang makina alang niini kay naguba.
Way laing nahimo si Marilou kondili ang pagsangpit sa Kahitas-an ug gipangutana kun duna bay mensahe kaniya ang maong hitabo.
Dihang nabalik sila sa Sugbo, nangita sila og tambalanan nga barato ang laparoscopy procedure, apan dunay higala ni Marilou nga nakatambag kaniya nga dili kini maayo.
Mirekomendar hinuon kini kaniya og usa ka herbal medicine ug ang hugot nga pagsalig sa Labaw nga Makagagahom alang sa kaayohan sa balatian sa iyang amahan.
“At that time, naay nakasulti nako nga, ‘Ayaw na hilabti, ampo lang Niya. Try pud og alternative medicine. So I said, ‘Aw motuo g’yud ko, ako gud ning giampoan,” matud pa ni Marilou.
Dihadiha, midangop siya kang Senyor Santo Niño. “I prayed. I asked prayers from friends,” dugang pa niya.
Paglabay sa mga semana ug mga buwan nga pag-ampo, ilang gipa-X Ray ang iyang amahan ug nakita sa resulta nga nagkagamay ang “bugol” diha sa baga niini.
Ang maong kalamboan sa panglawas sa amahan nakapalig-on sa debosyon ni Marilou sa Balaang Bata hangtud nga usa ka adlaw, ang doktor nga nag-atiman sa iyang amahan mikompirmar nga hingpit nang nawala ang “bugol” sa baga sa iyang amahan ug hingpit na kining naayo.
“Gihatag g’yud Niya ang miracle, na-heal g’yud niya akong papa,” pasabot pa niya.
Sa pagkakaron, dakong pahat sa kinabuhi ni Marilou ang pagdebosyon ngadto sa Senyor Sto. Niño pinaagi sa pagpasakop sa Cofradia del Santo Niño ug isip senior choir member sa basilica. (BANAT NEWS)