CEBU, Philippines – Apil nga maapektohan ang mga flights sa tugpahanan sa Mactan sa no fly zone nga ipatuman sa Manila atol sa pagbisita sa Santo Papa sa nasud.
Gitug-an ni Estee Marie Plunket, pangulo sa Corporate Affairs sa GMR-Megawide Cebu Airport Corporation, nga daghan sa mga flights nga gikan ug paingon sa Sugbo ang makanselar ug madelatar atol unya sa pagpatuman sa no fly zone sa tugpahanan sa kauluhan. Ang no fly zone ipatuman karong Enero 15 atol sa pag-abot sa Santo Papa ug sa Enero 17 atol sa pagduaw ni Pope Francis sa Tacloban City ug sa Enero 19 sa pagbiya na niya sa nasud. Nipahimangno daan ang taga tugpahanan sa mga pasahero nga naka-book na daan sa ilang mga flights sa Enero 15, 17 ug 19 sa pagduaw sa ilang website,www.mactancebuairport.com ug pagtawag sa mga numerong (032) 340-2486, pagsuta kun lakip ba ang ilang biyahe sa apektado.
Hinuon ang mga international flights nga molahos sa Sugbo ang dili ra maapektuhan sa ipatuman nga no fly zone sa Manila.
Samtang adunay giandam nga plano ang Sinulog Foundation, Inc. uban ang Simbahang Katoliko sa Sugbo ug kaparian sa Basilica Minore del Santo Niño kun mokalit pagdesisyon ang Santo Papa nga moduaw sa Sugbo. Gilantawan nga kun moduaw man ang Santo Papa sa Sugbo, posibleng mahitabo kini sa Biyernes o Sabado. Atol unya sa ipahigayun nga Santos nga Misa ni Pope Francis ngadto sa kauluhan sa Enero 18 nga dungan usab sa Sinulog Grand parade, mopakita ang SFI sa ubang parti sa Misa sa mga manan-away sa grandstand pinaagi sa duha ka big screen nga ipahimutang sa stage. – /GMR) (BANAT NEWS)