CEBU, Philippines - Nihatag og pinutos nga hinabang ang kagamhanan sa dakbayan sa Mandaue sa “sister town” nga lungsod sa Ronda nga biktima sa bagyong Seniang.
Si Felix Suico nga maoy pangulo sa City Risk Reduction and Management Council miingon nga ilang ihatud karong semanaha ang 50 ka sakong bugas, lima ka karton nga sardinas, noodles ug uban pa.
Si Ronda Mayor Mariano Blanco III ang nidawat sa hinabang niadtong Biyernes.
Matud ni Suico nga dali nilang gihatud sa maong lungsod ang hinabang human si City Legal Officer Giovanni Tianero nipahibawo kang Mayor Jonas Cortes labot sa gikinahanglang tabang sa nahisgutang lungsod. “Entrada pa lang sa Ronda, lisud na mi og sud kay nangliki ang dalan, samot pa nga naa lang gihapon ang grabeng lapok pagsulod na gyud namo sa lungsod,” matud ni Suico. Gitug-an ni Suico nga personal gyud niyang nakita ang lisud nga kahimtang sa mga molupyo sa maong dapit nga ang ilang lawak katulganan gitabonan pa sa daghang lapok. (BANAT NEWS)