CEBU, Philippines – Wala na nakapaabot sa tuig 2015 ang usa ka bana human naghikog patay ilawom sa punoan sa kahoy sa sitio Mahayahay, Apas, dakbayan sa Sugbo kagahapon sa buntag gumikan sa pagpangluod.
Ang naghikog patay naila nga si Ronald Tapic, 34-anyos ug nagpuyo sa maong lugar.
Matud ni SPO2 Rommel Bancog, imbestigador sa homicide section sa Cebu City Police Office, nga nagkalalis si Tapic ug ang asawa niadtong nakalabay nga adlaw gumikan sa pagpanghuwam og kwarta sa asawa.
Alas 6 sa buntag kagahapon, ang silingan nga si Michael Pabalinas ang unang nakabantay nga may nagbitay sa punoan sa kahoy sa gawas sa balay ug gituohan nga tawo-tawo lang ang gibitay. “Iya pa gani’ng gi-ingnan ang tagbalay nga naa lagi tawo-tawo inyong gibutang sa kahoy sayo sa buntag pa man gud,” matud ni Bancog.
Ang ugangan sa namatay ang nisusi ug nakita nga si Tapic ang naghikog patay gamit ang pisi.
Nagtuo ang pamilya nga wala nakauyon si Tapic sa pagpanghuwam og kwarta sa asawa hinungdan nga kini nangluod ug naghikog. – /GMR) (BANAT NEWS)