CEBU, Philippines – Gisikop sa kapolisan ang usa ka Swedish nga hubog human gireklamo’ng namuak og botelya sa ilimnon ug lamesa dayun nanghagis sulod sa disco bar sa Mango Square niadtong nakalabay nga kadlawon.
Ang dinakpan naila nga si Johan Felix Grondahl, 27, temporaryo nga nagpuyo sa usa ka pension house sa may Osmeña Boulevard ug Escario Extension sa siyudad sa Sugbo.
Ang mireklamo mao ang manager sa disco bar nga si Mark Aboganda. Dali nga niresponde ang duha ka sakop sa Fuente Police Station nga sila si PO3 Antonio Asoy ug PO1 Jonas Ricaplaza sa maong establesemento.
Nasuta sa medical examination nga hubog ang langyaw.
Matud pa ni PO2 Philip Plazos, desk officer sa Fuente Police Station, nga ila pa nga gipaabot ang manager sa disco bar aron mahibaw-an kung mopadayun ba pagreklamo batok sa langyaw.
Gipasabot ni Plazos nga posibleng may mahitabong pagsabotsabot tali sa duha ka habig.
Sigun pa ni Plazos nga ila pagawson ang langyaw kung moabot na ang reglementary period sa kaso nga wala pa’y mapasaka nga kaso batok sa dinakpan. – /GMR) (BANAT NEWS)