CEBU, Philippines – Gipugngan sa Philippine Coast Guard ang usa ka fishing boat nga nasakpan nga adunay karga’ng mga kinahon nga pinabuthan nga isda.
Anaa pa karon sa Pier 5 sa dakbayan sa Sugbo ang FB Christopher nga gipanag-iya sa usa ka Christopher Compa, taga Iloilo, nga may karga nga 58 ka kahon sa pinabuthang isda nga mamsa, anduhaw ug lipti.
Gibantayan sa taga Bureau of Fisheries and Aquatic Resources-7 ang bangka samtang wala pa nasikop ang kapitan si Roy Longno.
Matud ni Elvie Flores, officer-in-charge sa Fisheries Regulation and Enforcement, nga kagahapon sa alas 5 sa kadlawon na-intercept sa Naval Forces Central ug coast guard ang barko.
Ang pinabutha’ng isda gikompra sa Palawan ug gidudahang ibaligya kini sa mga merkado sa Sugbo sama sa Pasil ug uban pa.
Ang mga nasakmit nga isda gikatakdang ipangapod-apod sa mga charitable institutions sama sa orphanage, home for the aged, mga prisohan ug uban pa.
Subay niini, nipahimangno ang taga BFAR sa mga manindahay ug mamalitay nga dili gyud mopalit sa mga pinabuthan nga isda kay ang pamaagi sa pagkuha niini ilegal ug maoy usa sa hinungdan sa pagkaguba sa kadagatan. – /GMR) (BANAT NEWS)