CEBU, Philippines - Andam na ang groundbreaking sa ikatulong taytayan sa Sugbo ug isla sa Mactan sa unang semana sa Enero.
Ang kalihukan ipahigayun sa lungsod sa Cordova nga pangulohan ni Mayor Adelino Sitoy, Cebu City Mayor Michael Rama, mga opisyal sa Department of Public Works and Highways ug Metro Pacific Tollways Corp. (MPTC).
Ang ikatulong taytayan ugmaron sa MPTC nga subsidiary sa Metro Pacific Investment Corporation ubos sa pagdumala ni magpapatigayon Manuel V. Pangilinan.
Ang ikatulong taytayan manukad sa dakbayan sa Sugbo ug molagbas sa Shell Island ngadto na sa habig sa barangay Pilipog sa lungsod sa Cordova.
Mokabat sa P15 bilyones ang gibanabana nga gastuhon sa proyekto nga gilauman nga makasulbad sa nagkagrabe nga huot sa trapiko gikan sa Metro Cebu padulong sa Isla sa Mactan. (BANAT NEWS)