CEBU, Philippines - Ang Cebu City Traffic Operations Management mibutyag nga aduna sila’y bag-ong eksperimento nga dili gamiton ang mga traffic lights sa bayente tres ka mga intersections sa siyudad sa Sugbo sugod kagahapon.
Matud ni CITOM operations head Jonathan Tumulak nga ang maong pagtuon himuon lang sa peak hours sa buntag sugod alas-6 hangtud alas-9 ug sa gabii sugod alas-5 hangtod alas-8.
Sigon niya nga manual ang pagkontrolar sa traffic gamit ang mga traffic enforcers.
Matud ni Tumulak nga kining 23 sa 38 ka eskina sa labing busy sa siyudad maoy napilian tungod kay mao kini ang sagad magkaproblema tungod sa kadaghan sa mga sakyanan.
“Ang atong enforcers, through radio, agdon ang volume sa sakyanan nga gikan sa traffic light A, naa poy modawat sa traffic light B and motan-aw pud ngadto sa traffic light C kun bakante na. Dili man gud pareha og sukod ang distansya sa traffic lights,” matud niya.
Gibutyag sa CITOM nga ilang nadiskubrehan nga dili na magkatakdo ang traffic lights system sama sa distansya ug sa gidaghanon sa mga sakyanan.
Dugang ni Tumulak nga makatabang ‘sab ang maong eksperimento sa sunod unya nga pag-upgrade sa traffic lights sa siyudad. (BANAT NEWS)